شماره ۱ - شِهْ دُونِشْ جِهْ چِهْ گُوهِرْ اَفْشُونِسْتیمٰا؟

شِهْ دُونِشْ جِهْ چِهْ گُوهِرْ اَفْشُونِسْتیمٰا؟
خِشِهْ گُوئِهْ دُوسْتْ رِهْ دِشْمِنْ دُونِسْتیمٰا ۱

اَنْدی کِه کُمیْتِ عَقْلْ رِهْ رُونِسْتیمٰا
مِنْزِلْ بَرِ سییِنْ رِهْ نَتُونِسْتیمٰا ۲

یِکْذِرِّهْ نَمُونِسْ کِهْ نَخُونِسْتیمٰا
یِکْ نُکْتِهْ نَمُونِسْ کِهْ نَدُونِسْتیمٰا ۳

اِسٰا دَفْتِرِ دُونِشْ رِهْ َخُونِسْتیمٰا
هٰادُونِسْتیما، هِچّی نِدونِسْتیمٰا ۴

اَعْمٰالِ خُوشِهْ نُومِهْ بَخُونِسْتیمٰا
خینُو بِهْ خوشِهْ دیدِهْ فشُونِسْتیمٰا ۵

نَخُونِسْتِهْ دَفْتِرْرِهْ بَخُونِسْتیمٰا
بِهْ مِنْزِلْ دیمِهْ عَقِبْ بَمُونِسْتیمٰا ۶

اونْ مَحَلْ (کِهْ) تُونِسْتیمٰا نَدُونِسْتیمٰا
اِسٰا کِهْ بِدُونِسْتیمٰانَتُونِسْتیمٰا ۷

شِهْ نیک وُ بَدْتیمْ رِهْ دَشُونِسْتیمٰا
دِروُ کِرْدِنِ وَرْ، شِهْ دَمُونِسْتیمٰا ۸

هَمُونْ مَصْحَفْ (کِهْ) وَچِهْ بیمِهْ خُونِسْتیمٰا
بی شَکّْ وُ گِموُنْ خِدْرِهْ رِهُونِسْتیمٰا ۹

تا مَنْعَرِفِ خویشْ رِهْ بَخُونِسْتیمٰا
جُزْ ذٰاتِ خِدٰا دیگِرْ نَدُونِسْتیمٰا ۱۰